Ils Statuts da la Cumünaunza Culturela Pro Bravuogn

A. Nom e mira

Art. 1

Cul nom Cumünaunza Culturela Pro Bravuogn as ho furmeda üna societed seguond art. 60 – 77 CC cun residenza a Bravuogn.

Art. 2

La Cumünaunza Culturela Pro Bravuogn ho il scopo da salver e promouver cultura e lingua rumauntscha, in prüma lingia il bargunseñer; surtuot da:

• svaglier l'amur, l'interess, l'incletta per nossa lingua materna
• sclarir nossa populaziun in tuottas dumandas actuelas in reguard a la convivenza quotidiana
• tratgnair cun istorgettas e legendas, cun evenimaints importants, cun umur e spass
• unir Bargunseñers/Bargunseñras in ed our d'patria per furmer üna cumünaunza pü stretta
• sustgnair privats ed instituziuns chi haun üna mischiun linguistica u culturela

La Cumünaunza Culturela Pro Bravuogn sustegna:

• Cun cuntribuziuns renovaziuns da monumaints architectonics e dad inscripziuns rumauntschas sün chesas privatas, chesas d'affers, sün hotels ed ustarias.
• Il Museum Local cul intent da conserver e musser l'inter patrimoni culturel da nossas vschinaunchas, p.ex. ogets dal minchadi, mobiglia ed üsaglias, custüms, e documainta da valur culturela, istorica, linguistica, artistica u scientifica.
• Cun lavur redacziunela publicaziuns, p.ex la part rumauntscha dal «Muchetta».

B. Organisaziun

Art. 3

Organs da la Cumünaunza Culturela Pro Bravuogn sun: La radunanza generela, la suprastanza ed duos revisuors/revisuras da quint.

Art. 4

La radunanza generela ho lö minch'an aunz Pasqua. Ella piglia incunter e sancziunescha il rapport da gestiun, il rendaquint, il rapport dals revisuors/da las revisuras. Ella stipulescha la cuntribuziun annuela, tscherna u conferma minch’an la suprastanza e duos revisuors/revisuras da quint e deliberescha las tractandas preschantedas da la suprastanza. Per tschernas e decisiuns vela la magiurited da las vuschs. In cas da parited decida il president.

Art. 5

La suprastanza es l'organ executiv ed administrativ. Ella as cumpuona dad ün/a president/a, dad ün/a chaschier/a, dad ün/a actuar/a, dad ün/a assesssur/a tschernieus/das da la radunanza e d’ün/a delegio/eda pel Museum Local. Impü ho il cumün il dret da trametter ün/a delegio/eda.

La suprastanza scumparta traunter se las incumbensas seguond l'artichel 2 dals statüts u po deleger quellas a cumischiuns, in tel möd cha la mira da la societed vain ragiunta.

Art. 6

Ils revisuors/las revisuras da quint repassan a la fin da l'an da gestiun l'intera contabilited da la societed e rapportan in scrit a la suprastanza a maun da la radunanza generela.

C. Commembers, finanzas

Art. 7

Commembers da la Cumünaunza Culturela Pro Bravuogn sun persunas natürelas u giuridicas, collectivs u fautuors/ras chi pejan la cuntribuziun annuela.

Art. 8

La chascha vain alimenteda tres: cuntribuziuns dals commembers/da las commembras e dal cumün, duns e legats da vart privata. L'an da gestiun vo dals 1. schner als 31 december.

Per tuot ils dovairs da la societed respuonda unicamaing la faculted da quista.

Las contribuziuns annuelasper ils commembers:

• Singuls: 30 fr.
• Collectivs p.ex famiglias: 60 fr.
• Persunas giuridicas: 60 fr.
• Fautuors/as: 100 fr.

La commembranza vegn annuleda cun sortir da la societed u cun exclusiun.

La suprastanza po decider in egna competenza da sustgnair progets per ün import da fin 3000 fr.

D. Müdeda da statüts, schogliamaint e dispusiziun finela

Art. 9

La radunanza generela decida cun duos terzs da las vuschs preschaintas davart la müdeda da statüts u d'ün eventuel schogliamaint da la societed. In cas da schogliamaint vo l'intera faculted da la societed al cumün ed ho da quel da gnir druveda per progets da lingua e cultura rumauntscha.

Art. 10

Ils statüts preschaints sun gnieus trattos ed appruvos da la radunanza dals 23 marz 2024 ed aintran dalum in vigur. Els rimplazzan quels dals 4 avrigl 1992.

Appruvos da la radunanza generela.

Bravuogn, ils 23 marz 2024

Claudia Taverna, Linard Nicolay

Versiun dals 19 nov 24